Турскиот претседател Реџеп Таип Ердоган би можел повторно да се вклучи во изборната трка за шеф на државата доколку се распишат предвремени избори во април 2028 година, наговести неговиот висок советник Мехмет Уџум.
Иако редовните избори се планирани за мај 2028 година, турскиот Устав остава можност за порано одење на гласачките места. Уџум за турските медиуми прецизираше дека изборите би можеле да се одржат на 16 април 2028 година, под услов таквата одлука да биде поддржана од 360 од вкупно 600 претставници во парламентот.
„Доколку 360 претставници ја поддржат одлуката за распишување нови избори, тие ќе се одржат на 16 април 2028 година“, рече Уцум.
Токму овој потег би му овозможил на Ердоган да го заобиколи уставното ограничување од максимум два претседателски мандати, бидејќи законот дозволува уште една кандидатура во случај на предвремени избори.
Сепак, патот до гласање за оваа одлука ќе бара политички договори. Владејачката партија АКП на Ердоган и нејзините сојузници од партијата МХП моментално контролираат 326 места во парламентот, што значи дека нема да имаат поддршка од уште 34 пратеници за да распишат предвремени избори. Покрај тоа, Владата досега постојано ја уверуваше јавноста дека изборите ќе се одржат во редовниот рок.
Седумдесет и двегодишниот Ердоган владее со Турција повеќе од две децении. Тој дојде на власт како премиер во 2003 година, а беше избран за претседател во 2014 година. Откако Турција се префрли на претседателски систем, тој победи на изборите во 2018 година и повторно во 2023 година.
