Дневното пиење кафе влијае и на жолчното кесе, органот што складира жолчка потребна за варење на мастите. Истражувањата покажуваат дека кафето може да има одредени здравствени придобивки, но ефектот зависи од тоа дали лицето веќе има проблеми со жолчката.
Кафето го стимулира жолчното кесе да се контрахира и празни, што може да го намали ризикот од жолчни камења. Сепак, може да предизвика непријатност кај луѓето кои веќе имаат жолчни камења.
,,Редовното консумирање кафе го поттикнува жолчното кесе да се контрахира и празни, наместо да дозволи жолчката да стагнира“, вели д-р Џеј Лутар за EatingWell.
Ефект врз жолчното кесе
Безкофеиновото кафе може да го стимулира и празнењето на жолчното кесе, што укажува дека дејствуваат и други соединенија освен кофеинот.
„Со предизвикување чести контракции и одржување на протокот на жолчката, редовното пиење кафе може да помогне да се спречи стагнација на жолчката и нејзино стврднување во нови жолчни камења“, вели д-р Даниел Аткинсон.
Кај луѓе кои веќе имаат жолчни камења, контракциите на жолчното кесе можат да предизвикаат болка ако каменот го блокира жолчниот канал. Сепак, доказите дека кафето директно предизвикува вакви напади се ограничени. Доколку се појави болка по пиење кафе, се препорачува да се консултирате со лекар.
Аткинсон, исто така, ја нагласува важноста на хидратацијата: „Жолчката е составена од околу 95 проценти вода. Одржувањето добра хидратација спречува жолчката да стане премногу концентрирана и згусната, што е еден од главните предуслови за формирање на камења.“
Исхраната богата со растителни влакна, здрави масти, физичката активност и избегнувањето на екстремни диети се важни за здравјето на жолчното кесе.
„Не треба премногу да се грижите за вашето жолчно кесе ако се чувствувате добро. Нема потреба од никакви „чистења“ или детоксикации на жолчката“, заклучува Лутар.
