Главниот извршен директор на норвешкиот суверен фонд за богатство, најголемиот во светот, предупреди дека неговите средства од 2 трилиони долари би можеле да претрпат огромни загуби, па дури и целосно да исчезнат во случај на колапс на пазарот.
Норвешкиот фонд ги инвестира приходите од производството на нафта и гас во земјата во акции, обврзници, недвижности и проекти за обновлива енергија надвор од Норвешка. Неговата вредност се дуплираше за помалку од една деценија, достигнувајќи 1 трилион долари во 2017 година.
Директорот на фондот, Николај Танген, рече дека сака да ја подигне свеста за финансиските ризици со тоа што ќе го постави прашањето дали „нафтениот фонд“ би можел да исчезне.
„Одговорот е да, а најлошото е што, во светот во кој живееме сега, ова не е сосема невозможно“, изјави Танген.
Тој рече дека последните три децении се карактеризираат со „абнормална“ ситуација, со ниски даноци, инфлација и каматни стапки, период во кој фондот значително пораснал.
Во интервју за Ројтерс , Танген не спомена никакви неодамнешни пазарни случувања што конкретно го засегаат, но забележа сличности со периодот пред Големата депресија од 1929 година, вклучително и трговските тарифи.
Сепак, тој нагласи дека пазарите продолжуваат да растат и покрај негативните вести и дека глобалната економија покажа поголема отпорност отколку во минатото
