Европскиот систем за дигитална регистрација на влез и излез од ЕУ (ЕЕС) се соочува со технички проблеми, призна во петок претседателката на Европската комисија, Урсула фон дер Лајен.
„Работиме со земјите-членки за решавање на техничките тешкотии“, изјави таа на прес-конференција во Корк, Ирска.
Проблемите станаа поизразени за време на летната туристичка сезона, а аеродромите и авиокомпаниите тврдат дека новиот систем, кој бара патниците од земјите надвор од ЕУ да регистрираат биометриски податоци, предизвикува чекање со часови, доцнење на летови и пропуштени конекции.
Фон дер Лајен призна дека е потребна повеќе работа за решавање на проблемите, што е промена од претходните тврдења на Европската комисија дека влијанието на системот на повеќето аеродроми е ограничено.
Претставниците на европските аеродроми и авиокомпании наведуваат дека во најпрометните периоди, времето на чекање на граничните контроли може да биде до пет часа и побараа на државите да им се дозволи привремено да ја суспендираат примената на EES во текот на јули и август.
Системот EES бара од патниците од земји надвор од ЕУ, како што се Велика Британија и САД, отпечатоци од прсти и фотографија од нивното лице при првиот влез. Целта е да се заменат печатите во пасошите со дигитални записи и да се спречи пречекорување на дозволениот престој и употреба на фалсификувани патни документи.
Сепак, на некои големи аеродроми, граничните службеници сè уште внесуваат податоци рачно, додека апликациите за забрзана регистрација досега се активирани само од Шведска и Португалија.
Одредени аеродроми и пристаништа привремено го суспендираа собирањето биометриски податоци со цел да се намали застојот.
И покрај проблемите, Европската комисија ги истакнува безбедносните придобивки од системот. Според ирскиот министер за внатрешни работи, Џим О’Калаган, од воведувањето на EES, близу 110 милиони патници поминале низ системот, а идентификувани се приближно 1.000 лица кои претставуваат безбедносен ризик за Европската Унија.
