Поранешниот српски претседател Александар Вучиќ изјави дека Третата светска војна е неизбежна поради брзото вооружување на европските земји. Тој ова го кажа во интервју со руската новинарка Ксенија Собчак, објавено на нејзиниот YouTube канал „Осторожно: Собчак“.
Вучиќ зборуваше за растот на трошоците за одбрана низ цела Европа, особено во скандинавските земји и Шведска. Како пример го наведе германскиот одбранбен концерн „Рајнметал“, чиј профит, тврди тој, се зголемил за 17 пати.
„Не сум ниту глупав ниту слеп. Ако не гледате како Европа се вооружува, тогаш преправајте се дека не го гледате. А зошто се вооружува? За што?“, рече Вучиќ.
Тој ја спореди ситуацијата со правило од драмите на Антон Чехов.
„Како во драмите на Чехов: ако во првиот чин виси пиштол, ќе пука во третиот. Европа, зборувајќи за потребата да се заштити од Русија, драматично се вооружува. Кој не го гледа тоа?“, праша тој.
Кога Собчак го праша дали би било вистинско чудо ако сепак не започне светската војна, Вучиќ одговори: „Би бил најсреќниот човек ако грешам. Но, се плашам дека не грешам“.
Во истото интервју, тој рече дека Русија нема да биде првата што ќе употреби нуклеарно оружје, но дека, според него, ова може да биде само последица на потегот на другата страна. Тој зборуваше и за рускиот претседател Владимир Путин, за кого рече дека почнува да зборува потивко во преговорите кога е незадоволен.
Вучиќ претходно предупреди на голема војна, поточно во ноември минатата година кога рече дека „војната тропа на вратата на Европа и дека Србија мора да се заштити“.
