Градоначалникот на Општина Дебар, Фисник Мела, оствари официјална посета на Љубљана, каде што беше примен од градоначалникот на словенечката престолнина, Зоран Јанковиќ. Посетата беше реализирана со цел размена на искуства и добри практики во управувањето со современите градови.
На средбата се разговараше за повеќе теми поврзани со урбаниот развој, модерното управување со градовите и организацијата на комуналните услуги. Посебен акцент беше ставен на одржливиот развој и на моделите што Љубљана ги применува во областа на јавниот превоз, урбанистичкото планирање, чистотата на градот и управувањето со јавните простори.
Во рамките на посетата, делегацијата од Дебар оствари средба и со заменик-градоначалникот на Љубљана, Дејан Црнек, како и со раководителот на секторот за заштита на животната средина. На овие состаноци се разговараше за политиките и практиките што градот Љубљана ги спроведува во областа на заштитата на животната средина и одржливиот развој.
Од Општина Дебар посочуваат дека ваквите средби се важни за размена на искуства и идеи кои можат да придонесат за понатамошниот развој на општината и подобрување на услугите за граѓаните.
Од делегацијата упатија благодарност за топлото гостопримство и подготвеноста за соработка од страна на домаќините во Љубљана.
