АфД и советникот на Путин планираат да испорачуваат руски гас во Германија, извори на Ројтерс тврдат дека состанокот би можел да се одржи уште во март, ако заврши војната во Украина.
Главниот економски претставник на рускиот претседател Владимир Путин и раководството на крајно десничарската германска партија Алтернатива за Германија (AfD) започнаа подготовки за состанок закажан за следната година за обновување на снабдувањето на најголемата европска економија со руски гас, изјавија денес за агенцијата два информирани извори.
На состанокот, кој би можел да се одржи уште во март, ќе присуствуваат Кирил Дмитриев, близок советник на Путин и раководител на рускиот државен инвестициски фонд, како и копретседателите на AfD, Алис Вајдел и Тино Крупала, изјави еден од изворите.
Портпаролот на AfD и претставникот на Дмитриев одбија да коментираат за информацијата.
Русија обезбедуваше повеќе од една третина од увозот на сурова нафта на Германија и повеќе од половина од нејзините потреби за природен гас пред да бидат воведени санкциите поради руската инвазија на Украина во 2022 година.
Средбата би се одржала само доколку претходно се постигне договор за мировна рамка меѓу Русија и Украина, а организаторите се надеваат дека на неа ќе учествуваат претставници на AfD, Русија и САД, изјави изворот.
Израел, Обединетите Арапски Емирати (ОАЕ) или Индија се споменуваат како можни локации, додаде изворот.
