Рускиот уметник и голем критичар на режимот на Владимир Путин, Семјон Скрепецки, беше убиен во Полска, недалеку од границата со Белорусија.
Според сведоците, тој бил убиен во градот Бјала Подласка, а непознат маж испукал неколку куршуми кон него од пиштол од блиску.
„Изгледаше како егзекуција. Неколку истрели од блиску и еден за да го довршат“, изјави за Онет еден од полицајците што ја спроведоа истрагата.
Тие исто така истакнаа дека тој бил лесна цел.
„Русинот многу објавуваше на социјалните мрежи за тоа каде ќе биде. За жал, тој беше лесна цел“, додаде тој.
Сторителот/ите на убиствата веднаш избегале, а полицијата организирала потера. До денес, лицето кое го сторило убиството не е уапсено. На интернет има извештаи дека полицијата привела белоруски државјанин во близина на белорускиот конзулат во Бјала Подласка, но полицијата сè уште не го потврдила ова. Градот се наоѓа на приближно 40 км од белоруската граница.
Семјон Скрепецки е роден во Русија во 1981 година. Неговото вистинско име било Роберт Кузовков, а познат е и како Роберт Бурдаи и Скрепоносни Бузотер. До 2021 година живеел во Алтајската територија. Потоа, плашејќи се од политички прогон, емигрирал во Полска.
Тој се претстави како уметник и изведувач, градејќи го своето присуство на социјалните мрежи преку видеа во кои ја соочуваше уметноста со политичката реалност на современа Русија.
Неговиот YouTube канал, иако релативно мал, привлекуваше гледачи со својата искреност и бескомпромисен пристап.
Во својата содржина, тој често се претставуваше како коментатор, не само опишувајќи го светот, туку и разоткривајќи го. Критиката кон Владимир Путин, чеченскиот воен лидер Рамзан Кадиров и целиот владин систем не беше толку тема за него, колку основа на неговата работа.
