Овие четири повреди за време на секс се многу чести, а лекар од итна помош сега откри кога треба да посетите лекар.
Сексот е причина за многу сериозни повреди . Некои се резултат на едноставни несреќи, додека други бараат малку повеќе објаснување . Во секој случај, лекарите велат дека вистинскиот проблем обично не е самата повреда, туку времето што луѓето го губат затоа што се срамат да побараат помош.
„Повеќето повреди поврзани со сексуалниот однос може да се спречат и ниедна не треба да биде причина за срам“, изјави за „ХафПост“ д-р Мартина Амбарџиева, уролог и лекарка во итна помош.
„Проблемот се јавува кога срамот води до предолго чекање за да се побара помош. Ако нешто не е во ред – болка, крварење, оток или предмет што не излегува – едноставно дојдете. Верувајте ми, сè сме виделе.“
Еве неколку примери за тоа како изгледа ова во пракса.
Да, навистина, може да се скрши
Амбарџиева го нарекува ова еден од најитните случаи . „Толку е драматично колку што звучи – гласно пукање, моментален оток и многу паника“, рече таа. Се случува кога пенисот се лизга за време на пенетрацијата и силно ја удира карлицата на партнерот, предизвикувајќи руптура на фиброзната обвивка околу еректилното ткиво. Ако го одложите третманот, ризикувате трајно искривување, болни ерекции или долготрајна еректилна дисфункција. „Ова е една од оние повреди каде што времето е навистина од суштинско значење“, рече таа.
Она што влегува, не секогаш излегува
Амбарџиева редовно отстранува туѓи предмети од човечкото тело – краставици, моркови, па дури и молив од уретрата.
Вагиналниот канал е затворен простор. Ректумот , од друга страна, создава вакуум и нема анатомска опструкција, што значи дека предметите можат да патуваат подлабоко. „Важно е тоа да се нормализира“, рече таа. „Ги отстрануваме заглавените предмети секоја недела. Тоа е чест медицински проблем и не треба да се срамите од него.“
Повреда за која не се зборува
Повредите на вагиналната слузница предизвикани од триење се исто така честа причина за доаѓање тука, особено кај жени во постменопауза, а крварењето обично ги плаши пациентките повеќе отколку што самата повреда го оправдува.
Амбарџиева истакнува дека лубрикантите на база на вода се сушат брзо, што со текот на времето го зголемува триењето, додека оние на база на силикон траат подолго. Крварење кое не запира, силна болка, згрутчување на крвта или вртоглавица се знаци дека треба веднаш да посетите лекар.
Острата болка „таму долу“ никогаш не е добар знак
Поретка, но не и невообичаена појава е торзијата (извиткување) на тестисот за време на секс. „Тоа е ненадејна, остра болка во тестисот – и додека не се докаже спротивното, се смета за итна состојба“, рече Амбарџиева. Временскиот период за зачувување на тестисот е, приближно, четири до шест часа.
