Пожарниот фронт во Перистерија, на грчкиот остров Саламина, недалеку од Атина, е стабилизиран, но противпожарната служба останува во состојба на готовност поради ризик од разгорување, објавија денес грчките медиуми.
Пожарникарите се активни во областа и се распоредени на различни локации за справување со расфрлани пожари и чад, објавува EPT News.
Грчкиот портал „Катимерини“ во неделата објави дека најмалку две лица загинале во пожарот , 10 се повредени, а 502 лица биле евакуирани од крајбрежните области Сатерли и Колонес.
Зградите во Перистерија претрпеа сериозни штети, додека во неколку случаи пожарот остави зад себе само изгорени делови од зградите, што го отежнува дури и утврдувањето дали станува збор за станбени или деловни простории.
Возилата паркирани во близина на зградите, исто така, претрпеа значителна штета.
