Поп-ѕвездата Дуа Липа и актерот Калум Тарнер ја продолжија својата повеќедневна свадбена прослава во Италија, откако се венчаа претходно оваа недела во Лондон.
Имено, двојката организираше голема свадбена прослава за време на викендот, а свечената церемонија се одржа на отворено, по 17:00 часот, во Вила Валгуарнера во Палермо. По церемонијата, младенците им се придружија на гостите на подиумот за танцување, додека огномет го осветлуваше небото над Сицилија.
Посебен момент од вечерта беше настапот на легендарниот музичар Елтон Џон, кој ја изведе песната „Your Song“ во чест на младенците.
Според „The Sun“, прославата траела до доцна во ноќта, а гостите ја опишале атмосферата како спектакуларна. Меѓу присутните имало многу познати гости, меѓу кои и Чарли Екс-Си-Екс, Марк Ронсон и други ѕвезди.
Во текот на викендот, на гостите им беше послужено мени подготвено од готвачот со Мишелин ѕвездичка, Тони Ло Коко, а на масата беа претставени традиционални сицилијански јадења како што се панела, крока, анелети ала Норма, како и десерти каноли и касата.
Дуа Липа и Калум Тарнер го започнаа својот свадбен викенд во петокот со забава за добредојде, каде што пејачката носеше бел ткаен кожен фустан од Ботега Венета, додека меѓу гостите беа бројни познати актери и музичари.
Двојката претходно имаше граѓанска венчавка на 31 мај во Лондон, во градското собрание на Олд Мерилебон, по што нивните фотографии беа објавени и привлекоа големо внимание на јавноста.
По лондонската церемонија, во Италија беше најавен голем свадбен викенд, што предизвика реакции кај дел од локалното население поради привремените ограничувања во областа за време на организацијата на луксузниот настан.
Дуа Липа претходно ја потврди свршувачката во интервју за британскиот „Вог“ во јуни 2025 година, по месеци шпекулации. Таа и Тарнер првпат беа поврзани на почетокот на 2024 година, а јавно ја потврдија својата врска во јануари истата година на настан во Лос Анџелес.
