Унгарија се соочува со сериозна криза предизвикана од екстремна суша, бидејќи нивото на реката Дунав падна на најниската точка досега.
Ситуацијата ги принуди властите да преземат итни мерки, додека засегната е и работата на единствената нуклеарна централа во земјата, Пакс.
Поради недостаток на вода потребна за ладење на реакторите, еден од нив е ставен надвор од работа, додека капацитетот на друг реактор претходно беше намален. Како резултат на тоа, производството на електрична енергија во електраната значително се намали.
Нуклеарната централа Пакш обезбедува околу половина од електричната енергија на Унгарија, па затоа ограничувањето на нејзината активност претставува сериозен предизвик за енергетскиот систем на земјата, пишува euronews .
Унгарските власти ставија тимови за управување со водите во состојба на готовност и инсталираа пловечки пумпи и друга опрема во близина на централата за да го гарантираат снабдувањето со вода за системот за ладење, во случај нивото на Дунав да продолжи да опаѓа.
Рекордно ниското ниво на реката предизвикува проблеми и за речниот транспорт и туристичкиот сектор, додека општина Будимпешта најави мерки за заштеда на вода и справување со последиците од сушата.
Експертите предупредуваат дека продолжените топлотни бранови и климатските промени вршат сè поголем притисок врз водните ресурси и енергетската инфраструктура на Унгарија, зголемувајќи го ризикот од слични кризи во иднина.
