Поранешниот американски владин службеник Дејвид Раш беше уапсен во Вирџинија откако агенти на ФБИ пронајдоа 303 златни прачки, вредни повеќе од 40 милиони долари, во неговиот дом.
Според судските документи, Раш во текот на изминатата година постојано барал злато и девизи од американската влада за „трошоци поврзани со бизнисот“, а подоцна го зел материјалот во посед. Минатата недела против него беше поднесена пријава за кражба на јавни пари, додека тој е во притвор до рочиштето.
Американските медиуми објавија дека Раш до неодамна имал висока позиција во ЦИА. ФБИ соопшти дека апсењето се случило на 19 мај откако ЦИА, по внатрешна истрага, пријавила можно кршење на законот.
„Откако внатрешната истрага на ЦИА идентификуваше можно кршење на законот, директорот на ЦИА, Џон Ратклиф, ги проследи информациите до ФБИ за кривична истрага“, соопшти ФБИ.
Во судските поднесоци се наведува дека Раш имал пристап до класифицирани информации и одобрение од највисока класа. Истражителите дополнително го обвинуваат дека лажел за своето образование и воена служба при вработувањето, како и дека измамнички го користел военото отсуство со исплата на илјадници долари.
За време на претресот на куќата во Вирџинија на 18 мај, агентите пронајдоа, покрај 303 златни прачки, од кои секоја тежи околу еден килограм, околу два милиони долари во готово и 35 луксузни часовници, меѓу кои и неколку Ролекс часовници. Во судските документи не е наведено зошто Раш ги чувал златото и парите во својот дом, ниту пак постои запис дека му пријавил на својот работодавач што се случило со средствата што ги добил за службени цели.
