Украинскиот претседател Володимир Зеленски изјави дека советниците на американскиот претседател Доналд Трамп прават сериозни грешки, посочувајќи дека е исклучително болно за Киев да гледа како Трамп избира друга страна наместо да остане неутрален или на вистинската страна на историјата.
Како гостин во емисијата „Нецензурирано“ на Пирс Морган, тој беше прашан дали се чувствува предаден од неодамнешните настани, особено во светлината на
договорот за дизел на САД со Русија и таканареченото „енергетско примирје“.
Во својот одговор, Зеленски потврди дека ова чувство постои, но нагласи дека влоговите се многу повисоки од личните емоции.
„Малку е покомплицирано од моите емоции или чувства. Не зависи од мене. Нашата земја мора да преживее“, рече Зеленски, пренесува „Европска правда“.
Зборувајќи за договорите што вклучуваат пласман на руски дизел на американскиот и глобалниот пазар, Зеленски без двоумење изјави дека е штета што Украина губи силен партнер.
На прашањето да прецизира дали навистина верува дека Украина во моментов ги губи САД, тој одговори потврдно.
„Да, но не поради нас. Не можеме да бидеме слаби, инаку не можеме да преживееме. Не ја продаваме нашата земја. За нас, не станува збор за работа и бизнис, ова е наш живот. Ова е нашата земја, нашето тело, нашиот дом, нашите деца и ова е од клучно значење за нас. Затоа е болно кога претседателот Трамп избира една страна, а таа страна не е наша“, нагласи украинскиот претседател.
Зеленски истакна дека Украина нема проблем со тоа Трамп да заземе неутрална позиција, но дека смета дека преминувањето на спротивната страна е недозволиво.
„Во ред е за нас ако тој е во средината. Но, ако сте во средината, тогаш мора да останете во средината и да не одите на погрешната страна. Мислам дека неговите советници прават грешки. Не знам кој го турка да не биде на вистинската страна, но ова дефинитивно не е вистинската страна на историјата“, додаде Зеленски.
