Рускиот министер за надворешни работи Сергеј Лавров изјави денес дека САД делумно го изгубиле интересот и ентузијазмот за решавање на конфликтот во Украина.
Во интервју за „Шангај СМГ“, Лавров рече дека во Вашингтон сè повеќе велат дека Европа треба да се справи со Украина, додека САД ќе се фокусираат на Кина.
„Секогаш сме отворени за преговори. Гледате, се сметаше дека прашањето е затворено во Анкориџ, но не беше. Сè уште имаме канали за комуникација со американските претставници. Доколку во одреден момент бидат подготвени да продолжат со директните разговори, ќе биде интересно да се чуе како тие гледаат на ситуацијата што се разви по Анкориџ . Наскоро ќе наполни една година од самитот во Алјаска“, рече Лавров.
Тој нагласи дека енергетиката претставува основа на економската соработка меѓу Русија и Кина .
„Односите се темелат на многу силна материјална основа. Со години, трговската размена значително надминува 200 милијарди долари. Основата е, секако, енергијата“, рече тој.
Тој, исто така, оцени дека Русија и Кина се поврзани со најстабилните односи на двете големи сили во современиот свет, кои се темелат на принципите на меѓусебно почитување, корист и ценење на меѓусебните интереси, додавајќи дека по Втората светска војна, земјите „веќе биле центри на еден нов свет, заснован на принципите на Повелбата на ОН“.
Тој рече дека Русија и Кина се заинтересирани за нормални односи меѓу сите држави и дека не сакаат мултиполарноста да се претвори во хаос.
„Светот се менува. И да, тој веќе станува мултиполарен. Друго прашање е дали оваа мултиполарност ќе се претвори во хаос. Порано, постоеше еден господар кој управуваше со сите по исчезнувањето на Советскиот Сојуз, а сега, велат, тоа ќе стане хаотично и неуредно движење. Ниту Русија ниту Кина не ги сакаат ваквите прогнози. Ние не сакаме диктатите на една група земји да се претворат во хаос“, рече тој.
„Слабо западно влијание“
Лавров изјави дека „агресивната политика на Западот“ е последица на слабеењето на неговото влијание, како Западот да бил измамен дека санкциите ќе ги смачкаат Русија и Кина.
„Кина има технологии што ѝ помагаат на Русија да ги надмине вештачките и нелегалните пречки создадени од Западот. Ние активно го следиме курсот на технолошка независност и технолошки суверенитет“, рече тој.
Шефот на руската дипломатија ги нарече европските политичари кои зборуваат за преговори со Русија „ситни политичари“ и предупреди на „обновувањето на нацистичкиот дух“ во Европа.
Тој, исто така, оцени дека е потребно да се реформираат меѓународните институции како што е Советот за безбедност на ОН преку проширување на застапеноста на азиските, африканските и латиноамериканските земји.
