„Мајкрософт“ предупреди за организирана сајбер шпионска кампања, за која компанијата вели дека е поврзана со руските разузнавачки служби и дека ги таргетира гостите на хотели, конференциски центри и други јавни места.
Според предупредувањето, главни цели се државните службеници и вработените во компаниите кои патуваат од службени причини.
Откако ќе се поврзат со Wi-Fi мрежата на хотелот, на корисниците им се прикажува лажно известување за ажурирање на нивниот прелистувач или оперативен систем.
Наместо ажурирање, на уредот се инсталира злонамерна програма (малвер) која може да украде лозинки, документи и други чувствителни податоци.
Исто така, може да го снима секое притискање на копче и да ја активира камерата и микрофонот без знаење на корисникот, пишува abcnews .
Мајкрософт проценува дека не станува збор за изолирани напади, туку за координирана операција за сајбер шпионажа со избрани цели.
Експертите ги повикуваат патниците да не инсталираат ажурирања на софтверот преку скокачки прозорци што се појавуваат по поврзувањето со јавни Wi-Fi мрежи и да користат само официјални извори за ажурирање на уредите, бидејќи бесплатната интернет-врска може да стане сериозен ризик за безбедноста на податоците.
