Германскиот канцелар Фридрих Мерц изјави дека руските хибридни закани вклучуваат напади врз инфраструктурата и попречување на комуникациските системи, предупредувајќи дека германските граѓани сè уште го потценуваат нивниот обем.
За време на дискусијата на конференцијата „Берлински глобален дијалог“ во Берлин, Мерц рече дека обидите на Русија да го дестабилизира германското и европското општество се негова најголема загриженост, пренесува Укринформ.
Мојата најголема загриженост во моментов не е нашата економија, Европската Унија, Америка или Кина. Мојата најголема загриженост е влијанието на Русија врз нашето општество и начинот на кој таа успева да ги дестабилизира нашите општества – рече Мерц.
Според него, руските хибридни закани се очигледни и ги надминуваат информациите со кои располагаат разузнавачките служби.
– Да бидам искрен, нема ништо тајно во врска со заканите од Русија со кои се соочуваме – рече германскиот канцелар.
Мерц како примери ги наведе нападите врз германската инфраструктура, прекините во интернетот и комуникациските системи, како и нападот со беспилотни летала врз аеродромот во Лајпциг.
– Тоа се случува секој ден. Мешање на нашите интернет системи, нашите комуникациски системи, секој ден, нагласи канцеларот.
Мерц повика на зајакнување на отпорот на Германија на вакви напади и нагласи дека општеството мора да го разбере обемот на заканата.
– Според мене, нашите граѓани сè уште ја потценуваат оваа голема закана за нашето општество – рече тој.
Германскиот канцелар нагласи дека не станува збор само за безбедноста на Германија, туку и за напад врз европскиот политички поредок.
– Ова не е само војна во Украина. Ова е фундаментален напад врз целиот политички поредок што го изградивме по 1990 година – рече Мерц.
