Цената на суровата нафта од типот Брент денес се искачи на околу 97,50 долари за барел, достигнувајќи го највисокото ниво за шест недели, со очекувања дека периодот на ограничена понуда ќе потрае.
Тоа е за 40 проценти повеќе отколку пред избувнувањето на војната во Иран, објави „Трејдинг економикс“.
Американската сурова нафта WTI се искачи на околу 92 долари за барел, што е највисоко ниво за три месеци.
Иран објави дека е блиску до договор со Оман за воспоставување рута за танкери што ќе минуваат низ Ормускиот теснец.
Сепак, острата реторика на Вашингтон кон отворањето на коридорот го зголемува ризикот од понатамошна ескалација, бидејќи САД и Иран продолжуваат со меѓусебните напади врз воени и комерцијални бродови.
Американскиот министер за енергетика Крис Рајт изјави дека Вашингтон ќе го задржи своето поморско присуство и блокада.
Зголемувањето на цените на нафтата е ограничено со повлекување на залихите од стратешките резерви на големите економии за да се ублажат ефектите од зголемениот увоз и прекините во снабдувањето.
Стратешките резерви на нафта во САД (SPR) паднаа на помалку од 290 милиони барели, што е најниско ниво од 1982 година.
Во исто време, Кина значително го намали увозот на сурова нафта, додека рафинериите во таа земја ја намалија преработката за околу 1,6 милиони барели дневно.
Ова укажува на пад на потрошувачката на сурова нафта, и покрај стабилната побарувачка за рафинирани нафтени производи.
