Криста Пајк страда од „когнитивни тешкотии“ и „тешка психолошка траума“ по неуспешната егзекуција, открија нејзините адвокати.
50-годишната затвореничка осудена на смрт се освести во вторник откако преживеа два неуспешни обиди за нејзино погубување со смртоносна инјекција во затворот со максимална безбедност Ривербенд во Нешвил на 30 септември.
– Иако нејзиното физичко закрепнување е извонредно, сè уште постојат значајни прашања за долгорочните последици од сè што претрпе – изјавија нејзините адвокати, пренесува Њујорк пост.
– Криста се справува со тешка психолошка траума од преживувањето на неуспешната егзекуција, вклучувајќи го ужасот, болката и несигурноста што ги чувствувала верувајќи дека ќе умре –
– Криста продолжува да има когнитивни тешкотии, вклучувајќи проблеми со концентрацијата и меморијата – додадоа адвокатите.
Пајкова беше осудена на смрт за бруталното убиство на нејзината 19-годишна соученичка од „Џоб Корпс“, Колин Слемер, во јануари 1995 година, кога имала 18 години.
Нејзиниот правен тим верувал дека таа е мозочно мртва во понеделник вечерта и дека следниот ден ќе биде исклучена од апаратите за одржување во живот. Сепак, таа се разбудила во вторник наутро, а во среда попладне почнала да оди со помош на други.
Во соопштението, адвокатите наведоа дека нејзините раце, кои беа тешко повредени за време на обидот за егзекуција, почнаа да заздравуваат и ја враќаат подвижноста.
– Белите дробови ѝ се чисти и почна да се храни со својата вообичаена исхрана – изјавија тие. „Лекарите се охрабрени од нејзиното физичко закрепнување.“
Пајкова требаше да стане првата жена погубена во Тенеси по повеќе од 200 години, но наместо тоа стана првата личност за која се верува дека преживеала обид за егзекуција со смртоносна инјекција во САД.
Гувернерот на Тенеси во заминување, Бил Ли, ги запре сите преостанати егзекуции закажани за оваа година и нареди независна истрага за тоа што тргнало наопаку.
Во соопштението, адвокатите на Пајк го повторија своето барање гувернерката Ли да ја замени нејзината смртна казна со доживотен затвор без можност за условна слобода.
– Таа не смее повторно да биде подложена на обид за погубување – изјавија тие.
