Вицепремиерот и министер за транспорт и врски, Александар Николоски, објави дека земјата генерално има проблем со мобилизирање на работната сила и смета дека е паметно и добро што Владата одлучила да ја зголеми годишната квота од 10 на 13 илјади странски работници.
Според Николовски, следната година квотата треба да се зголеми уште повеќе.
„Ако сакате мое мислење, мислам дека следната година треба да се искачи на 20 илјади, а до 2030 година треба да достигнеме 50 илјади странски работници годишно кои работат во Македонија, ако сакаме да го одржиме ова ниво на раст на БДП“, рече Николоски синоќа во емисијата „360“, додавајќи дека на „Бехтел и Енка“ сега не им недостасуваат работници бидејќи квотата е зголемена, а пред да ја зголемат им недостасувале 670 работници.
Владата донесе одлука за квота од 10.000 работни дозволи за странски државјани за 2026 година, која ќе стапи на сила на 16 јануари. Од нив, 9.750 дозволи се за редовно вработување, 200 за испратени странци и 50 за сезонски ангажмани. Во рамките на редовното вработување, 4.500 се за нови работници, додека 5.250 се за продолжување на веќе издадените дозволи.
Вкупниот број на странски работници со дозволи за престој (6.128 во 2025 година) е три и пол пати поголем во споредба со пред пет години, кога дозволи добиле 1.704 лица. Најголем интерес за вработување странци има во градежништвото, индустријата, угостителството и трговијата. Меѓу земјите со најмногу работници се Бангладеш, Непал, Индија, Турција, Кина и Филипините.
