Куба разви нов препарат за третман на меланом, еден од најагресивните облици на рак на кожа, а лекот наскоро треба да влезе во фаза на клинички испитувања врз луѓе.
Кубанскиот центар за молекуларна имунологија (CIM) објави дека го развил препаратот 2C12, кој е подготвен да започне клинички испитувања кај луѓе со напреднат рак на кожа, меланом, и покрај тешкотиите и тешките енергетски и економски услови предизвикани од „американската блокада“, објавија кубанските државни медиуми.
„2C12 е нова надеж во борбата против ракот. Неговата функција е да му помогне на природниот одбранбен механизам на човечкото тело поефикасно да ги препознава и да се бори против клетките на ракот“, објави CIM на социјалните медиуми, пренесува Granma daily.
Во соопштението се наведува дека станува збор за лек со карактеристики слични на пембролизумаб, еден од третманите што се користат на меѓународно ниво за стимулирање на одговорот на имунолошкиот систем против туморските клетки.
Во соопштението на CIM се вели дека пембролизумаб не е достапен во Куба поради превисоката цена и ембаргото на САД.
Според информациите објавени од CIM, првата клиничка студија со 2C12 ќе се спроведе во болници во Хавана, во Националниот институт за онкологија и радиобиологија, во Клиничката хируршка болница „Ерманос Амеихеирас“ и во Универзитетската онколошка болница „Селестино Хернандез“ во покраината Вила Клара во вентралниот дел на Куба.
