Петнаесетмесечниот Заид Нофал беше убиен во израелски воздушен напад врз семејната куќа во бегалскиот камп Ал-Буреиџ, додека неговата мајка, Фатима Нофал, беше ранета заедно со нејзините две ќерки.
Нападот се случил околу 3 часот наутро, кога проектил ја погодил куќата на семејството Нофал, закопувајќи го момчето под урнатините. Фатима Нофал, 38-годишна Палестинка, рекла дека се разбудила неколку минути пред ударот и се преселила на друго место поради интензивната топлина, додека Заид останал покрај прозорецот за да спие подобро.
Иако самата била повредена, таа останала на местото на нападот и ги повикала соседите да го бараат нејзиниот син. Заид бил извлечен од под урнатините, завиткан во лесно ќебе и однесен во болница, но не преживеал.
Неговата смрт отвори нова траума за ова семејство. Во израелски напад на 13 октомври 2023 година, тројца од нејзините синови беа убиени: 16-годишниот Амин, 11-годишниот Хамза и Ахмед, новороденче старо 22 дена. Фатима Нофал и нејзините две ќерки исто така беа ранети тогаш, а по уништувањето на засолништето, семејството помина низ повеќекратни раселувања, пишува Middle East Eye.
Десет месеци по таа загуба, таа дознала дека е повторно бремена, а раѓањето на Заид на 16 април 2025 година донесе нова надеж во семејството.
„Раѓањето на Заид беше најважниот настан во нашите животи за време на војната. Неговото доаѓање донесе огромна радост за целото семејство; сите го славеа како мало чудо кое дојде да ни ги разубави животите по долги месеци и ноќи исполнети со болка и солзи“, рече таа.
Нејзините ќерки исто така беа повредени во последниот напад. Постарата Бараа претрпе полесни повреди, додека помладата Лина претрпе повреда на главата и беше задржана во болница. Мајката вели дека сè уште не ѝ кажала дека Заид е убиен.
Според УНИЦЕФ, околу 260 деца се убиени во Газа од почетокот на прекинот на огнот, додека израелските напади одзедоа повеќе од 73.000 палестински животи од октомври 2023 година. На денот кога беше убиен Заид, деветгодишниот Ратил ал-Абадла беше убиен во друг напад. Фатима Нофал тврди дека палестинските цивили, особено жените и децата, се цел на напади.
„Оган ми гори во градите и не знам кој ќе го изгасне“, рече таа.
