Американската администрација за храна и лекови (FDA) го одобри Вегови, лек за слабеење од Ново Нордиск, во форма на таблети.
Вегови е првата орална верзија на GLP-1, лек што се продава за слабеење, пишува NBC.
Слична таблета од „Ели Лили“ се очекува во наредните месеци. Лековите GLP-1, првично одобрени за дијабетес, станаа популарни поради значителното губење на тежината што можат да го обезбедат.
Досега се користеа во форма на инјекции – Оземпик, Вегови, Мунџаро, Зепбаунд, додека Вегови сега доаѓа како таблета, што го олеснува администрирањето и е психолошки поприфатливо за пациентите.
Таблетата се зема секојдневно, обично наутро на празен стомак, а дозите постепено се зголемуваат за да се намалат несаканите ефекти, најчесто гадење и повраќање.
Во клиничко испитување, пациентите на највисока доза изгубиле во просек 16,6 проценти од телесната тежина по 64 недели, во споредба со 2,2 проценти во плацебо групата.
Ефикасноста е слична на инјектибилната верзија на Вегови, но малку пониска од некои конкурентски инјекции како што е Лили Зепбаунд (губење на тежината од 22,5 проценти).
„Ново Нордиск“ сè уште не ја објави цената на таблетата, но се очекува да биде поевтина од неделните инјекции. Таблетата ќе биде широко достапна од јануари, а компанијата го зголеми производството за да избегне недостиг.
