Руските парламентарни избори за прв пат ги вклучуваат жителите на украинските територии анектирани од Москва во 2022 година, додека Киев и Европската Унија го нарекуваат гласањето целосно нелегален чин.
Гласањето низ цела Русија започна во петок и продолжува до недела, но во окупираните делови на Украина и некои погранични региони на Русија започна кон крајот на минатиот месец. Руските власти наведоа „безбедносни причини“ како објаснување за овој продолжен изборен период.
Москва тврди дека има повеќе од 3,5 милиони гласачи во регионите Донецк, Луганск, Херсон и Запорожје. Русија ги анектираше овие територии во септември 2022 година, иако никогаш немаше целосна контрола врз нив, а меѓународната заедница не го призна овој потег.
Паралелно се одржува гласање на Кримскиот полуостров, кој беше анектиран од Русија во 2014 година.
Рускиот претседател Владимир Путин рече дека жителите на тие области гласаат за Државната дума „за прв пат од нивното повторно обединување со Русија“. Тој исто така додаде дека руските војници вклучени во борбите ќе гласаат и во својата порака до гласачите наведе:
„Вашиот избор и решителност уште еднаш ќе покажат дека милиони луѓе стојат зад нашите борци, дека ние сме единствен народ, поврзан со заеднички вредности, историско сеќавање и љубов кон нашата татковина и дека никој не може да нè раздели или заплаши, ниту да ја поткопа нашата државност и политички систем.“
Украинските власти ги оценија изборите на овие територии за нелегални и ги повикаа странските влади и меѓународните организации да не ги признаваат резултатите под никакви околности. Коалиција од девет украински организации за човекови права ги повика жителите на окупираните територии да не излегуваат на гласачките места, предупредувајќи дека изборниот процес се користи исклучиво за легитимирање на окупацијата.
Виолета Артемчук од организацијата „Донбас СОС“ изјави дека членовите на локалните изборни комисии, придружувани од руски војници и безбедносни служби, директно ги посетуваат куќите и ги принудуваат луѓето да гласаат.
Политичкиот аналитичар Володимир Фесенко оцени дека „изборите одржани со пиштол се едноставна фарса“ и дека таквите процедури немаат никаква врска со демократијата.
