Рускиот претседател Владимир Путин го намали значењето на недостигот на гориво во Русија, а во исто време ги отфрли предлозите за примирје и рече дека војната во Украина ќе продолжи сè додека не се исполнат неговите цели.
Украинските напади врз руските рафинерии и енергетската инфраструктура се интензивираа од март, а според украинските власти, нивната цел е да извршат притисок врз Москва да ја прекине војната. Се проценува дека околу една третина од руските капацитети за рафинирање на нафта се надвор од функција, додека производството на бензин е намалено за околу 17 проценти, на 850.000 барели дневно. Во неколку руски региони е воведено рационирање, а возачите чекаат со часови во редови за да се наполнат со гориво.
Крим, кој беше нелегално анектиран од Русија во 2014 година, е погоден од најголем недостиг, па затоа продажбата на бензин на граѓаните таму е целосно суспендирана. Минатиот викенд, Путин одржа состанок со владини претставници и призна дека земјата поминува низ „тежок период“. Тој најави забрзување на поправките на енергетските централи и можност за увоз на бензин за да се компензира она што го нарече „привремен“ недостиг.
Путин тврди дека украинските напади имаат за цел да го поделат руското општество, да ја запрат руската офанзива и да го принудат Кремљ да преговара под услови што би му одговарале на Киев. „Нема да им дадеме таква шанса“, рече тој. Во исто време, тој го отфрли предлогот на Украина и западните сојузници за примирје, со образложение дека тоа ќе им овозможи на украинските сили да се одморат и да се прегрупираат.
Во четвртокот вечерта, руската армија изврши масовен 11-часовен напад врз Киев, во кој загинаа најмалку 21 лице. Тоа беше еден од најсмртоносните напади врз украинската престолнина од почетокот на руската инвазија. Според Обединетите нации, досега во војната загинале повеќе од 16.000 украински цивили.
