Пензионираниот генерал-полковник на руската армија Леонид Ивашов му соопшти на Владимир Путин дека ја изгубил војната во Украина. Тој повика на итен прекин на борбите и враќање на преговорите, објавија украинските медиуми.
Ивашов ја даде изјавата во пренос во живо со рускиот блогер Павел Иванов. Обраќајќи му се директно на Путин, тој рече: „Изгубивте, не предвидовте ништо. Немавте мозок да разберете дека војната нема да биде некаква лесна операција: брзате, ѕиркате некаде и тоа е тоа, победа“.
Според него, „лесната воена операција“ што ја вети Кремљ е целосно неуспешна. Продолжувањето на војната, рече тој, ја турка Русија кон целосна милитаризација и длабока стагнација на цивилниот живот, од економијата и образованието до културата. Тој додаде дека продолжувањето на борбите ја уништува иднината на земјата заради политичкиот опстанок на еден човек.
Ивашов претседава со Серуското собрание на офицери и е критичен кон војната уште од нејзиниот почеток. Во февруари 2022 година, неколку недели пред инвазијата, тој јавно го предупреди Кремљ дека нападот врз Украина би можел да го загрози самото постоење на Русија. Потоа го повика Путин да поднесе оставка.
На крајот од минатата година, тој оцени дека Русија веќе доживеала стратешки пораз во војната.
Неговата изјава доаѓа во време кога во Абу Даби започнуваат разговори меѓу Русија, Украина и САД за можен мировен договор.
