Саудиска Арабија преговара со купувачи за да ги снабдува со нафта надвор од Ормускиот теснец, како дел од долгорочните договори што почнуваат следната година.
Со ова, системот што се користеше за време на војната со Иран би можел да се воведе како траен модел, со цел зголемување на уделот на Ријад на светскиот пазар, според извори запознаени со преговорите за Блумберг денес.
Преговорите се во тек и треба да бидат завршени до крајот на годината, изјавија изворите, кои зборуваа под услов на анонимност поради доверливоста на разговорите.
Доколку се постигне договор, според проценките на „Блумберг“, тоа би претставувало значителна промена во начинот на кој Саудиска Арабија испорачува сурова нафта до клиентите, бидејќи долгорочните договори го сочинуваат најголемиот дел од извозот на кралството.
Војната, која сега е во осмиот месец, ги наруши традиционалните транспортни правци за нафта, додека сообраќајот низ Ормутскиот теснец е сериозно отежнат.
Главните извозници од Персискиот Залив мораа да ги прилагодат своите методи на испорака за да обезбедат снабдување за клиентите.
Еден од системите што се користат вклучува транспорт на нафта низ теснецот, по што товарот се префрла на други танкери надвор од тој воден пат.
Таквиот начин на транспорт стана важен за одржување на понудата на пазарот во услови на зголемена конкуренција за клиентите.
Државната компанија „Сауди Арамко“ разгледува и други промени, вклучително и избор на референтни цени за нафта, како и можност за директно испраќање товар до клиенти во Азија, велат изворите.
„Арамко“ исто така бара начини за организирање на поморски транспорт и директна испорака на повеќе нафта до клиентите, велат изворите.
Тие додадоа дека конечните одлуки сè уште не се донесени и дека деталите, вклучувајќи ги цените, трошоците за превоз и обемот што би бил опфатен со новите аранжмани, сè уште се дискутираат.
Од почетокот на војната, сопствениците на бродови не сакаат да влезат во Ормутскиот теснец, што им отежнува на купувачите да најдат танкери по прифатливи цени дури и кога има достапна нафта.
Поради оваа причина, во Ормутскиот теснец беше воведен систем за пренос на товар, кој го користеа Обединетите Арапски Емирати, Саудиска Арабија, Кувајт и Ирак за испорака на нафта надвор од тој воден пат.
