Доаѓам како пријател на пријатели, дури и како брат на братска земја и ви благодарам за тоа. Нашите две земји се поврзани со искрено пријателство, меѓусебно почитување, а нашите билатерални односи се пример за добрососедска соработка во регионот, изјави црногорскиот претседател Јаков Милатовиќ на заедничката прес-конференција со претседателката Гордана Силјановска-Давкова.
Милатовиќ, кој е во официјална посета на земјата, нагласи дека двете земји се поврзани и со длабока историска блискост потврдена со солидарност и меѓусебна поддршка.
„Испраќаме пораки за регионална соработка и добрососедска поддршка. Го цениме фактот што Северна Македонија беше меѓу првите земји што ја призна Црна Гора, а тоа стана силна основа за развој на нашите билатерални и дипломатски односи“, нагласи Милатовиќ.
Црногорскиот шеф на државата рече дека европската перспектива на двете земји зазема посебно место, при што Црна Гора силно го поддржува европскиот пат на земјата.
„Оваа земја секогаш ќе има сојузник и целосна поддршка во нас. Целта ни е да станеме 28-ма земја-членка на ЕУ и на овој начин да покажеме дека европската перспектива на овој регион не е само сон, туку и реалност“, нагласи Милатовиќ.
Претседателката Силјановска-Давкова, од своја страна, нагласи дека таа и нејзината колешка потврдиле дека се одличен пример за регионално добрососедство, добар пример за соработка во рамките на НАТО, а денешната средба дополнително ја зајакнува довербата.
„Она што беше ново за двајцата беше потпишувањето на меморандумот за соработка меѓу младинските совети и очекувам овој меморандум да внесе свежина и креативност во нашите односи“, рече Силјановска-Давкова.
Таа нагласи дека заедничка визија е стабилен и просперитетен регион интегриран во ЕУ, а самитот ЕУ-Западен Балкан, како што рече, што ќе се одржи во Црна Гора, е доказ дека прашањето за членството на регионот не е само прашање поврзано со иднината, туку прашање кое треба и може да стане реалност.
„Целосна интеграција на Балканот е неопходна за ЕУ да биде навистина инспиративна и комплетна заедница. Регионалната соработка не е само наша обврска, туку и право, а меѓусебната поддршка на земјите од Западен Балкан е неопходна за мене. Ако не се почитуваме едни со други, ако не се разбираме едни со други, го отежнуваме нашиот пат кон ЕУ“, нагласува Силјановска Давкова.
