Сирени се огласија низ цела Турција во 9:05 часот наутро по локално време, по повод 88-годишнината од смртта на Мустафа Кемал Ататурк, основачот и прв претседател на Република Турција. Централната церемонија се одржува во Аниткабир во Анкара, каде што е погребан.
Како што се случува секоја година на 10 ноември, во моментот на смртта на Ататурк, животот во Турција застанува, а граѓаните стојат на улиците, во училиштата и институциите во минута молчење.
Според турските медиуми, претседателот Реџеп Таип Ердоган го посети Аниткабир со државниот врв, а по церемонијата е предвидено да се обрати на комеморацијата во седиштето на Вишиот институт за култура, јазик и историја „Ататурк“.
Аниткабир, според соопштението на управата на мавзолејот, е отворен за граѓаните до 22 часот по официјалната церемонија.
Ататурк починал на 10 ноември 1938 година во Долмабахче палатата во Истанбул, во 9:05 часот наутро, на 57-годишна возраст. Неговото тело, завиткано во турско знаме, било изложено во големата церемонијална сала на палатата три дена, а било пренесено во Аницабир на 15-годишнината од неговата смрт, на 10 ноември 1953 година.
Роден е во 1881 година во Солун. Станал познат како командант во Битката кај Галиполе, а по Првата светска војна ја предводел Турската војна за независност.
Тој ја прогласи Републиката на 29 октомври 1923 година и беше нејзин претседател до неговата смрт. Тој го укина калифатот, ја воведе латинската азбука и правото на глас за жените и го доби презимето Ататурк („татко на Турците“) во 1934 година.
Неделата на Ататурк се одржува од 10 до 16 ноември во Турција, со програми посветени на неговиот живот и основањето на републиката.
