Украина престана да објавува информации за бројот на ракети лансирани од Русија за да избегне откривање на ниската стапка на пресретнување од страна на украинските системи за воздушна одбрана.
Украинската воздушна одбрана се соочува со недостиг од пресретнувачки ракети за ракетниот систем „Патриот“ , пишува „Фајненшл тајмс“.
Украинските власти изјавија за медиумите дека во последните неколку недели Киев веќе потрошил мал број пресретнувачи што ги испорача Вашингтон, а недостатокот на ракети стана еден од позначајните проблеми во системот за воздушна одбрана.
Според овој медиум, Украина престанала да објавува информации за бројот на ракети лансирани од Русија, со цел да се избегне откривање на ниската стапка на пресретнување од страна на украинските системи за воздушна одбрана.
Може да се претпостави дека овој број е близу до нула, како што беше на 1 август, кога украинскиот претседател Володимир Зеленски призна дека „само една балистичка ракета“ од 30 истрелани била пресретната, „едноставно затоа што нема „патриоти““.
Зеленски повторно побара помош и ги повика партнерите да ја забрзаат испораката на дополнителни системи за воздушна одбрана и пресретнувачки ракети. Тој прецизираше дека антибалистичките капацитети, вклучувајќи ги пресретнувачите за „Патриот“, „САМП/Т“ и други системи, како и авионите Ф-16, се многу важни за Украина.
Киев соопшти дека им се потребни најмалку 300 ракети за системите „Патриот“ за да се „подготват за зима“.
Во исто време, украинските власти наведуваат дека залихите на овие пресретнувачки ракети се намалени, и тоа токму во периодот кога Русија го зголеми производството и употребата на балистички ракети.
Зеленски, исто така, побара милост од Европејците кои ги имаат системите „Патриот“, меѓу кои се Шпанија и Грција, барајќи од овие земји да му дадат дел од залихите. Сепак, по нападите на САД и Израел врз Иран, САД и некои земји од Заливот потрошија значителни количини ракети, а надополнувањето може да трае со месеци или години.
Недостатокот на „патриоти“ е растечки проблем. Според Центарот за стратешки и меѓународни студии со седиште во Вашингтон, САД испалиле повеќе од половина од своите 2.200 ракети „Патриот“ за време на 38-дневната војна со Иран. Американската војска има на располагање помеѓу 759 и 827 ракети, а тој број ги вклучува и пресретнувачите лоцирани на сојузничка територија во земји како Јужна Кореја и Германија.
Претходен договор од самитот на НАТО, потсетува „Фајненшл тајмс“, предвидуваше можност Украина да добие лиценца за производство на ракети за „Патриот“ во Украина и Европа. Сепак, како што наведуваат, Трамп подоцна зазеде повнимателен став кон тој договор.
