Украина има шестмесечен период во кој мора да ја преземе иницијативата на фронтот од Русија и да ја зајакне својата позиција за мировни преговори, изјави за Ројтерс командантот на Третиот украински армиски корпус, Андриј Билецки.
Во интервју за Ројтерс , Билецки рече дека ова е „пресвртница“ по четири години војна. Тој додаде дека верува оти руската војска е исцрпена и неспособна за големи пробиви.
Според него, доколку украинската армија успее да изгради и одржи моментум во наредните месеци, таа би можела да ја преземе иницијативата по линијата на фронтот и да ја принуди Русија да се откаже од плановите за окупирање на последниот дел од регионот Донецк во источна Украина што сè уште не го контролира.
„Верувам дека следните шест до девет месеци се клучен период. Всушност, мислам дека следните шест месеци се најкритични“, изјави Билецки за Ројтерс.
Прашањето за контролата врз Донецк претставува камен на сопнување во мировните преговори поддржани од САД, кои се во застој бидејќи Русија се стреми кон целиот регион, додека Украина одбива да се повлече од територијата што руските сили не успеаја да ја освојат.
„Треба да ги одредиме насоките каде што можеме да ги подобриме нашите позиции, да заземеме одредени стратешки точки, а потоа да разговараме со Русите од позиција на сила, а не на слабост, за вистински одржлив прекин на огнот. Од воена гледна точка, ова е реално“, изјави тој.
Инаку, Русија ја започна својата инвазија врз украинската држава на 24 февруари 2022 година.
