Лидерот на СДСМ, Венко Филипче, на денешната седница за пратенички прашања, остро го критикуваше премиерот Христијан Мицкоски, оценувајќи дека некомпетентноста, корупцијата и лагите се директно штетни за граѓаните, за што директно го обвини Мицкоски.
„Некомпетентноста, коруптивните практики и лагите со кои владеете сè повеќе излегуваат на виделина. Дури и „силните“ односи со јавноста не помагаат, луѓето едноставно повеќе не веруваат, маските паднаа и повеќе не можете да го криете ова“, нагласи Филипче.
Тој нагласи дека Владата нема одговор за низата случаи на контаминирана вода низ целата земја и дека граѓаните остануваат без информации за ризиците по нивното здравје, додека никој не презема одговорност за труењето на граѓаните.
„Водата е загадена во половина од земјата: во Гостивар, во Валандово, во Скопско, во некои општини, а немате одговори на многу прашања. Чија е одговорноста, кој го спровел инспекцискиот надзор, зошто не известиле и не ги објавиле резултатите соодветно?“, праша Филипче.
Филипче побара Владата веднаш да ги објави резултатите од анализите на водата во Гостивар и да стави крај на ширењето на контрадикторни информации од страна на институциите.
„Зошто не ги објавувате резултатите од водата во Гостивар? Зошто имате контрадикторни изјави, вие едно, министерот за здравство друго, дека наводно била добра за пиење, а потоа водата била само технички исправна? Луѓето се збунети, не знаат што да прават и не знаат кому да веруваат“, рече Филипче.
