Социјалната мрежа Инстаграм повеќе не им дозволува на јавните профили да лансираат преноси во живо ако имаат помалку од илјада следбеници, а истата судбина ги очекува и приватните профили.
Во последните неколку дена, корисниците на Инстаграм почнаа да пријавуваат дека нивните сметки повеќе не ги исполнуваат условите за пренос во живо преку оваа популарна апликација, а причината е што компанијата Мета ги промени условите.
„Ги променивме условите за користење на оваа функција. Само јавни профили со илјада или повеќе следбеници можат да започнат пренос во живо“, гласеше известувањето кога корисниците се обидоа да започнат пренос во живо, што Мета подоцна го потврди за Engadget.
Новото правило беше имплементирано за да „обезбеди најдобро искуство за креаторите на преноси во живо“ и да „поттикне подобрувања во целокупното искуство со користење на функцијата“. Зошто корисниците на Инстаграм со помалку од илјада следбеници не можат да го обезбедат „најдоброто искуство“, Мета не објаснува.
Сепак, тоа не е сè, бидејќи Мета изјави дека истото правило важи и за приватните профили, кои постепено ја губат можноста за започнување преноси во живо. Ова очигледно значи откажување на претходниот услов од минимум три блиски пријатели за користење на оваа опција.
