Ново вознемирувачко видео од меѓуврсничко насилство ја шокираше македонската јавност. На снимката, која се споделува на социјалните мрежи, се гледа како девојче е опколено од група врсници, а потоа изложено на физичко насилство – добива шлаканици, удари и клоци, додека присутните го снимаат настанот наместо да го спречат.
Според објавените информации, инцидентот се случил во Куманово. Видеото предизвика лавина реакции, а граѓаните бараат брза идентификација на учесниците и соодветна одговорност за сторителите.
Случајот повторно ја отвори дебатата за сè почестото меѓуврсничко насилство, како и за улогата на социјалните мрежи во ширењето на вакви снимки.
Се очекува надлежните институции да ги утврдат сите околности и да преземат мерки согласно законските надлежности. Доколку во случајот се вклучени малолетници, постапката ќе се води во согласност со прописите за заштита на децата и малолетните лица.
