Апелациониот суд во Скопјe донесе конечна одлука со која делумно ја усвојува жалбата на Зијадин Села и го зголемува износот на надоместокот што Република Северна Македонија мора да му го исплати за нематеријалната штета претрпена за време на нападот врз Собранието на 27 април 2017 година.
Со пресудата на Апелациониот суд, државата е должна да му исплати на Села вкупно 7.800.000 денари за повреда на личните права поврзани со неговото физичко и ментално здравје.
Според образложението на Апелациониот суд, првостепениот суд не ја проценил доволно сериозноста на предизвиканата штета и не ги зел предвид сите релевантни околности што влијаат врз утврдувањето на правичната отштета.
„Износите утврдени во првостепената пресуда не ја исполнуваат целта на обештетување, не овозможуваат вистинско надоместување и не ја одразуваат сериозноста на повредите што ги претрпел тужителот како резултат на критичниот настан“, се наведува во образложението на одлуката.
Според пресудата, надоместокот се дели на следниов начин:
1.500.000 денари за физичка болка; 900.000 денари за доживеан страв; 3.000.000 денари за душевна болка како резултат на намалување на општата животна активност; 600.000 денари за душевна болка поради обезличување; 600.000 денари за повреда на личното достоинство; 600.000 денари за повреда на честа; 600.000 денари за повреда на угледот.
Апелациониот суд ја отфрли како неоснована и жалбата на Државното обвинителство, кое бараше поништување на пресудата и повторно судење на случајот.
Во својата граѓанска тужба, Зијадин Села побара вкупно 61 милион денари отштета за штетата претрпена за време на насилните настани во Собранието на Северна Македонија на 27 април 2017 година.
