Студеното време носи и почести настинки, а ако се борите со некоја, различните видови овошје можат да ви помогнат во имунитетот – од цитрусни овошја до бобинки.
Кога ќе нè зафати настинка, правилната исхрана може да биде силен сојузник во зајакнувањето на имунитетот и побрзото закрепнување. Особено важна улога играат овошјата богати со витамини, минерали и антиоксиданси, бидејќи тие му помагаат на телото да се бори против вирусите и да ги намали воспалителните процеси.
Цитрусните овошја се меѓу најбогатите извори на витамин Ц, кој игра клучна улога во зајакнувањето на имунитетот. Витаминот Ц им помага на белите крвни зрнца поефикасно да ги напаѓаат вирусите, а воедно делува и како антиоксиданс кој го намалува воспалението.
Затоа пред сè се препорачуваат агруми (портокали, лимони, грејпфрути, мандарини). Топлата вода со лимон дополнително го смирува грлото и го хидрира телото.
Кивито е еден од најбогатите извори на витамин Ц, а неговото редовно консумирање помага во зајакнување на одбранбениот систем и намалување на чувството на исцрпеност.
Ананасот содржи бромелаин, ензим кој ја разредува слузта и го олеснува кашлањето. Тој е освежителен и пријатен, па затоа многу луѓе лесно го толерираат дури и кога немаат апетит.
Јаболката се благопријатни за желудникот и богати со растителни влакна и антиоксиданси. Тие се одличен избор кога имате недостаток на апетит или чувствителен желудник.
Бобинките (боровинки, малини, капини) се вистински нутритивни „бомби“ со високо ниво на антиоксиданси кои му помагаат на телото да се бори против инфекции.
Со вклучување на овие видови овошје во вашата дневна исхрана за време на настинка, телото добива дополнителна поддршка во ублажување на симптомите и побрзо обновување на енергијата.
