Таа временска рамка не се промени и покрај двомесечната војна за која Доналд Трамп вели дека ја започнал за да го спречи Техеран да изгради бомба.
Проценките на американските разузнавачки служби велат дека на Иран ќе му бидат потребни помеѓу девет месеци и една година за да изгради нуклеарно оружје , што е непроменето од минатото лето.
Тој временски рок не се промени и покрај двомесечната војна што, според американскиот претседател Доналд Трамп, ја започнал за да го спречи Техеран да изгради бомба, пренесува новинската агенција Ројтерс.
Залихи на ураниум и експертски проценки
Според Меѓународната агенција за атомска енергија (МААЕ), Иран има доволно високо збогатен ураниум за производство на 10 бомби, под услов да се збогати дополнително.
Во исто време, нуклеарните инспектори на Обединетите нации не успеаја да утврдат каде се наоѓаат приближно 440 килограми ураниум збогатен до 60 проценти.
„Колку што ни е познато, Иран сè уште го поседува целиот свој нуклеарен материјал“, рече Ерик Бруер, поранешен висок аналитичар на американското разузнавање, кој ги водеше проценките за нуклеарната програма на Иран. „Тој материјал веројатно се наоѓа во длабоки подземни објекти низ кои американската муниција не може да проникне.“
Иран постојано негира дека се обидува да развие нуклеарно оружје. Американските разузнавачки агенции и МААЕ наведуваат дека Техеран ја суспендирал својата програма за развој на боеви глави уште во 2003 година.
Ставот на американската администрација
И покрај непроменетата проценка на разузнавањето, некои функционери, вклучувајќи го и американскиот државен секретар Марко Рубио, тврдат дека американските напади врз воздушната одбрана на Иран ја намалиле нуклеарната закана. Тие веруваат дека ова ја намалило способноста на Иран да ги брани своите нуклеарни постројки доколку одлучи да го забрза развојот на оружје.
„Додека операцијата „Полноќен чекан“ ги уништи нуклеарните постројки на Иран, операцијата „Епски бес“ се надогради на тој успех и ја уништи одбранбената индустриска база на Иран, која ја користеа како штит за своите нуклеарни амбиции“, изјави портпаролката на Белата куќа, Оливија Вејлс. „Претседателот Трамп одамна јасно стави до знаење дека Иран никогаш не смее да има нуклеарно оружје – и тој не блефира“.
