Во неделата, украинскиот претседател Володимир Зеленски изјави дека Русија повторно ја употребила својата балистичка ракета со среден дострел „Орешник“, овој пат во регионот на Киев.
Руското Министерство за одбрана подоцна го потврди лансирањето, велејќи дека тоа е дел од одмазднички напад по украинските напади врз „цивилни цели“, што Киев го негираше.
Употребата на ракетата „Орешник“ од страна на Москва предизвика силни реакции во странство.
Германскиот канцелар Фридрих Мерц го осуди нападот како „неодговорна ескалација“ и ја потврди поддршката на Германија за Украина.
Францускиот претседател Емануел Макрон, исто така, ги осуди најновите руски напади, велејќи дека повторно биле нападнати цивилни цели во Украина.
Тој ја опиша наводната употреба на ракетата „Орешник“ со нуклеарна моќ како знак за застој во воените напори на Русија и опасна ескалација на конфликтот.
Макрон додаде дека Франција ќе продолжи да ја поддржува Украина и напорите за праведен и траен мир.
Претседателката на Европската комисија, Урсула фон дер Лајен, изјави дека масовниот руски напад ја покажува „бруталноста и непочитувањето на Кремљ и кон човечкиот живот и кон мировните преговори“.
Теророт врз цивилите, рече таа, не е „сила“, туку „очај“.
Таа додаде дека Европската Унија ќе продолжи да ја поддржува Украина, особено преку зајакнување на нејзините системи за воздушна одбрана.
Шефицата за надворешна политика на ЕУ, Каја Калас, ги опиша нападите како „гнасни терористички акти“ против украинското цивилно население.
Таа рече дека Русија дошла до воен ќорсокак и затоа намерно ги напаѓа градските центри.
Калас ја нарече наводната употреба на ракетата Орешник особено алармантна, опишувајќи ја како „неодговорна нуклеарна акција“.
Се очекува министрите за надворешни работи на ЕУ да разговараат за понатамошен притисок врз Русија следната недела.
Инаку, првата позната употреба на ракетата „Орешник“ се случила во 2024 година за време на нападот врз украинскиот град Дњепарк.
