Институтот за јавно здравје го регистрираше првиот случај на инфекција со вирусот Зика во Северна Македонија. Станува збор за граѓанин на земјата кој се заразил по убод од комарец додека престојувал на Малдивите.
Според ИЈЗ, пациентот престојувал на Малдивите од 20 до 28 мај и во овој период пријавил дека го каснал комарец. Веднаш по враќањето во земјата, тој се јавил на преглед во Клиниката за инфективни болести.
На 17 јуни, Одделот за вирусологија при ИЈЗ го потврди позитивниот резултат за вирусот Зика, по што епидемиолозите контактираа со пациентот и презедоа потребни превентивни мерки.
Спроведени се епидемиолошки истражувања, случајот е официјално пријавен, областа околу живеалиштето на пациентот е дезинфицирана и дадени се препораки за спречување на сексуално пренесување на вирусот.
ИЈЗ ги повикува граѓаните веднаш да побараат медицинска помош откако ќе бидат каснати од комарци доколку почувствуваат симптоми како што се треска, главоболка, осип на кожата или невролошки нарушувања, особено ако неодамна патувале во тропски или суптропски земји.
