Општина Аеродром започна со изработка на проект за нов сообраќаен режим во населбите Мичурин и Стар Аеродром, кој предвидува воведување еднонасочни улици, нови паркинг-места и велосипедски патеки.
Проектот ги опфаќа улиците „Владимир Комаров“ и „Симеон Кавракиров“, а целта е подобро и поефикасно искористување на уличниот простор и поорганизирано движење на возилата.
Според Општината, во Стар Аеродром се предвидуваат околу 200 паркинг-места, додека во Мичурин се планирани 215 нови паркинг-места.
Со новата организација на сообраќајот треба да се обезбеди подобра распределба на просторот меѓу возачите, велосипедистите и пешаците, како и подобри услови за велосипедски сообраќај.
Од Општина Аеродром велат дека продолжуваат со подготовка на конкретни решенија за подобро уреден јавен простор и поквалитетно секојдневие за граѓаните.
