Советот на ЕУ денес одобри привремени мерки за либерализација на трговијата со Ерменија за поддршка на нејзината економија откако Русија неодамна воведе трговски ограничувања врз земјата.
Усвоените мерки ќе либерализираат околу 80 проценти од ерменскиот извоз во ЕУ преку суспендирање на увозните давачки за широк спектар на производи, вклучително и одредени земјоделски.
Привремениот преференцијален аранжман за ерменски производи ќе се применува две години, објави Советот.
Хелен Мекенти, министерка за надворешни работи и трговија на Ирска, која моментално претседава со ЕУ, изјави дека Унијата ја зголемува својата поддршка за Ерменија и Ерменците кои, „и покрај надворешните притисоци, јасно го избраа проевропскиот пат“.
„Одлуката (на Советот) ќе ѝ помогне на економијата на Ерменија, која е погодена од трговските ограничувања, и покажува дека нашите партнери секогаш можат да сметаат на ЕУ“, рече таа, пренесува Business.
Советот на ЕУ објави дека привремените мерки ќе придонесат за поддршка и зајакнување на трговијата на Ерменија со ЕУ во согласност со Сеопфатниот и зајакнат договор за партнерство (CEPA).
Преференцијалната трговија доаѓа со одредени услови и вклучува заштитни мерки во случај увозот од Ерменија негативно да влијае врз производителите од ЕУ. Беше одобрена со гласање во Европскиот парламент по предлог на Европската комисија.
