Жена која претходно го обвини Џеј Зи дека ја силувал кога имала 13 години, ги повлече своите тврдења, велејќи дека никогаш не се сретнала ниту разговарала со американскиот рапер.
Неименувана жена првично поднесе тужба во 2024 година тврдејќи дека Џеј-Зи, чие вистинско име е Шон Картер, заедно со Шон Комбс, познат како П. Диди, ја дрогирале и ја силувале. Според нејзините изјави во тоа време, инцидентот се случил по церемонијата на доделување на наградите на МТВ во 2000 година.
Џеј-Зи ги негираше обвинувањата, опишувајќи ги како обид за уцена, додека Комбс исто така ги негираше обвинувањата. Адвокатот на Џеј-Зи претходно тврдеше дека опишаните настани не се вклопуваат во временската рамка што ја наведе жената.
Жената ја повлече тужбата во 2025 година, по што Џеј-Зи поднесе контратужба. Додека таа правна постапка продолжува, таа сега изјави дека нејзините тврдења за Џеј-Зи се неточни.
„Шон „Џеј-Зи“ Картер никогаш не ме силувал. Никогаш не сум се сретнала ниту разговарала со г-дин Картер. Г-дин Картер никогаш не ми направил ништо непристојно“, рече таа во изјава добиена од списанието „Ролинг Стоун“.
Таа додаде дека „ниту едно од нејзините обвинувања против г-дин Картер не е вистина“ и призна дека нејзините лажни обвинувања му предизвикале на Џеј-Зи, како што рече, „огромна болка, страдање и штета што никогаш не може целосно да се поправи“.
Жената сега е отстранета од тужбата на Џеј-Зи, но раперот сè уште го води случајот против своите поранешни адвокати. Тие требало да знаат, тврди тој, дека обвинувањата се „спротивни на јавно достапните информации, меѓусебно неконзистентни и неподдржани од никаква веродостојна приказна или истрага“.
Порано овој месец, адвокатот Тони Базби и неговиот правен тим побараа тужбата да биде отфрлена, опишувајќи ја како „злонамерно покрената постапка“.
Во врска со новата изјава на жената, Базби за „Ролинг Стоун“ изјави: „Ако поради некоја причина сега тврди дека нè излажала нас и судот, тоа се нови информации“.
Нејзиниот сегашен адвокат, Џејмс Блер Њуман помладиот, рече дека неговата клиентка сè уште тврди дека била жртва на сексуален напад, но дека „целосно погрешила во идентификувањето на г-дин Картер во нејзините обвинувања“.
Жената ја продолжи својата изјава наведувајќи дека сеќавањата на сексуалниот напад ѝ се вратиле откако видела реклама во која се повикуваат луѓето кои тврдат дека биле жртви на Шон Комбс да се јават.
Комбс, во меѓувреме, беше предмет на повеќекратни обвинувања за сексуален напад. Во посебна постапка, тој беше прогласен за виновен по две точки од обвинението поврзани со организирање превоз со цел вршење проституција, а во октомври 2025 година беше осуден на четири години и два месеци затвор.
Жената, исто така, изјави дека откако ги изнесе обвинувањата, не била свесна дека всушност е поднесена тужба во нејзино име. Откако изрази сомнежи во врска со сопствените тврдења, тужбата беше повлечена.
Џеј-Зи претходно проговори за тоа како обвинувањата влијаеле на неговиот живот. Откако тужбата беше отфрлена, тој рече: „Траумата што ја преживеавме јас, мојата сопруга, моите деца, моите најблиски и јас никогаш не може да се игнорира“.
Во интервју за GQ во март оваа година, тој го опиша и гневот што го чувствувал во врска со целиот случај.
„Одамна не сум бил толку лут, гневот беше неконтролиран. Не можете да му го направите тоа на некого – мора да бидете апсолутно сигурни за нешто такво“, рече тој.
Џеј-Зи, исто така, рече дека ја отфрнува можноста за вонсудска спогодба.
„Не можам да прифатам спогодба – тоа едноставно не е во мојата природа. Би умрел“, рече тој.
