Американската држава Тенеси се подготвува да ја погуби 50-годишната Криста Пајк, која би можела да стане првата жена погубена во државата по повеќе од 200 години во среда, освен ако гувернерот Бил Ли не даде помилување во последен момент.
Пајк чека егзекуција со смртоносна инјекција откако Врховниот суд на Тенеси го одби нејзиното последно барање за одложување. Одбраната поднесе обемна петиција од 226 страници за помилување, а експерти за човекови права на Обединетите нации, исто така, повикаа на запирање на егзекуцијата.
Случајот датира од 1995 година, кога тогашната 18-годишна Криста Пајк, заедно со нејзиното момче Тадарил Шип (17), брутално ја претепале, мачеле и убиле 19-годишната Колин Слемер во тренинг камп за проблематични тинејџери во Ноксвил.
Убиството привлече огромно медиумско и јавно внимание откако беше откриено дека жртвата имала врежан пентаграм во градите. Пајк ја обвини Колин дека се обидела да го киднапира нејзиното момче.
Една година подоцна, Пајк беше осуден на смрт, додека Шип доби доживотен затвор со можност за условна слобода.
За време на годините жалби, нов тим адвокати и форензички психолози откри шокантни детали од детството на осудената жена. Пајк била подложена на тешка физичка, психолошка и сексуална злоупотреба уште од мала возраст и била силувана повеќе пати пред да стане полнолетна.
Психолозите велат дека поротата за време на првичното судење во 1996 година никогаш не добила можност да ги слушне сите наоди за нејзините трауми и тешки ментални нарушувања. На Пајк официјално ѝ беше дијагностицирано биполарно растројство во затвор во 2021 година, покрај претходно дијагностицираниот ПТСН.
„Нејзиниот случај е единствено убедлив – не само поради нејзината навистина неразбирлива историја на сексуално насилство, туку и поради комбинацијата од тоа со нејзината младост и ментална болест“, вели Сандра Бабкок, професорка на Правниот факултет Корнел.
Сепак, федералниот апелационен суд ги отфрли претходните аргументи на одбраната, тврдејќи дека новите докази во голема мера го повторуваат она што поротата веќе делумно го слушнала од нејзините роднини и нема да ја промени конечната пресуда.
Мајката на убиеното девојче, Меј Мартинез, останува непоколеблива во својата поддршка на егзекуцијата, велејќи дека Пајк мора да плати за злосторството и дека само тогаш семејството може да најде мир.
Од друга страна, Пајк од својата ќелија изјави дека не сака ниту еден од нејзините најблиски да присуствува на погубувањето за да не ги изложи на дополнително страдање. Таа, исто така, упати посебно барање до властите нејзиниот трансфер и погубување да бидат управувани од женски тим чувари, со цел да се спречи понатамошно реактивирање на траумата предизвикана од злоупотреба во детството.
Доколку биде погубена на 30 септември, Криста Пајк ќе стане 19-тата жена погубена во САД од 1970-тите, во споредба со повеќе од 1.600 погубени мажи.
Одлуката за нејзината судбина сега е исклучиво на гувернерот Бил Ли, кој никогаш не дал помилување во случај на смртна казна.
