Американскиот државен секретар Марко Рубио изјави дека странски актер „јасно“ бил вмешан во наводниот заговор за бомбашки напад во близина на британската воздухопловна база Ферфорд во Глостершир, но не даде докази за тоа тврдење.
Рубио го изјави ова неколку часа откако петмина британски државјани од Лондон, кои беа уапсени во близина на базата во неделата, беа ослободени со кауција, објави „Гардијан“.
Тие се во раните 20-ти години и се уапсени под сомнение за кривични дела поврзани со експлозиви и планирање терористички напад.
Полицијата започна истрага откако локален земјоделец пријавил три бели комбиња во близина на Кралските воздухопловни сили Ферфорд, дом на американските бомбардери.
Првичната проверка на возилото покренала сомневања дека превезувале експлозивни материјали , но подоцна било утврдено дека не се пронајдени експлозиви.
Една од насоките на истрагата се однесува на можната поврзаност со Иран.
Корпусот на Исламската револуционерна гарда во јули соопшти дека базата е легитимна цел, додека иранската амбасада во Лондон негираше вмешаност во инцидентот.
Рубио им се заблагодари на британските власти за нивното справување со случајот, но рече дека ја разбира загриженоста околу одлуката осомничените да бидат пуштени со кауција.
Американскиот претседател Доналд Трамп претходно изјави дека нема да ги ослободи и, кога беше прашан дали случајот е поврзан со Иран, одговори дека „можеби е“.
Шефот на британската единица за борба против тероризмот, помошникот комесар Лоренс Тејлор, изјави дека ослободувањето на осомничените не значи дека истрагата е завршена и дека тие се подложени на „строги услови“ на надзор.
Британски извори наведуваат дека сè уште не е утврдено што планирале осомничените.
