Во основно училиште во градот Сташков, во округот Чадца во северна Словачка, ученик од осмо одделение утрово нападна неколку лица со нож во училишната зграда.
Во нападот загина еден наставник, додека друг наставник и еден ученик беа тешко повредени.
Според официјалните информации од Оперативниот центар за итна медицинска помош на Словачка, спасувачките екипи испратиле два медицински хеликоптери на местото на несреќата.
„Воздушните спасувачи го пренесоа детето во критична состојба во болница. По укажаната прва помош, 44-годишна пациентка со убодна рана во градите исто така беше префрлена во болница со хеликоптер. За жал, 61-годишната жена претрпе сериозни повреди и, и покрај обидите за реанимација, таа подлегна“, потврди портпаролката на спасувачката служба Петра Климешова.
Портпаролката на полицијата, Даниела Кочкова, изјави дека безбедносните сили преземаат сите потребни мерки за решавање на ова сериозно кривично дело.
Кратко по интервенцијата, полицијата нагласи дека осомничениот напаѓач е под контрола и дека повеќе нема непосредна опасност за другите ученици и персоналот на училиштето.
