Однесувањето на владејачката партија во Република Северна Македонија треба да ја поттикне Бугарија да заземе поцврст став, сметаат од ВМРО – Бугарско национално движење. Од партијата се огласија по одговорот на ВМРО-ДПМНЕ за поканата на лидерот на бугарското ВМРО, Красимир Каракачанов, до Мицкоски да присуствува во Софија за погребување на посмртните останки на цар Самоил.
Вчера, претседателот на ВМРО – Бугарско национално движење, Красимир Каракачанов, упати покана до премиерот Христијан Мицкоски да ја посети Софија и да присуствува на церемонијата за погребување на посмртните останки на цар Самоил.
„Согласно Договорот за пријателство и добрососедство од 2017 година, двете држави заеднички им оддаваат почест на историски личности и настани. Поради тоа, Каракачанов ја упати поканата до македонскиот премиер за заеднички да му оддадат почест на големиот бугарски цар Самоил, личност која е дел од историјата и на Бугарија и на Македонија“, велат од Бугарското национално движење.
Од ВМРО-ДПМНЕ му одговорија на Каракачанов дека е посоодветно да ги покани своите истомисленици Заев и Филипче.
Според бугарското ВМРО, очигледно е дека владејачката партија ДПМНЕ во Северна Македонија не само што не го почитува Договорот за пријателство и добрососедство, туку и општата одлука на заедничката комисија за историски прашања, со која се разјасни каков владетел бил Самоил.
„Нивната реакција исто така јасно покажува дека властите во Република Северна Македонија немаат намера да се откажат од своето отворено антибугарско расположение – став што не само што им штети на добрососедските односи, туку претставува и главна пречка за почеток на преговорите за пристапување кон Европската Унија. Ова писмо од владејачката партија во Северна Македонија треба да ја поттикне бугарската дипломатија да заземе многу појасен и порешителен став – став што исклучува каков било компромис за прашања важни за Бугарија и за бугарскиот народ“, се наведува во соопштението.
Во врска со ставот на ВМРО-ДПМНЕ, Каракачанов вели:
„Не знам дали кралот Ричард Први е погребан во Франција – нека за тоа расправаат Французите и Англичаните. Важно е тоа што, во повеќе од илјада години по смртта на цар Самоил, неговите современици го идентификувале како цар на Бугарите, а не како цар на некакви ’Македонци‘. Дури и Василиј Втори, кој ги ослепил војниците на цар Самоил, е познат како ’Убиец на Бугарите‘, а не како ’Убиец на Македонците‘. Понатаму, наследникот на цар Самоил, цар Јован Владислав, се идентификувал како бугарски цар и наследник на бугарскиот цар Самоил – идентитет што тој самиот го врежал на камена плоча.
Во текот на изминатиот милениум, историчарите ширум светот – вклучително и српската историска заедница – доследно го препознаваат и дефинираат цар Самоил исклучиво како бугарски владетел и цар на сите Бугари, дури и ако некои поединци во Република Северна Македонија денес одбиваат да го признаат тоа.
Ако г-дин Мицкоски не сака да дојде во Софија, можеби би било добра идеја тој и неговите колеги министри да го посетат градот Битола; таму, во локалниот музеј, се чува токму таа плоча што му припаѓала на истиот тој бугарски цар, Јован Владислав.“
