Малкумина би одбиле шолја добар чај. Сепак, дневниот избор помеѓу чај и кафе може да има значително влијание врз здравјето на коските кај жените, покажува ново истражување.
Остеопорозата е чест здравствен проблем кај жените над 50 години.
Секоја трета жена ќе биде дијагностицирана со оваа болест, која се јавува кога телото не успева да ја замени старата коска што е природно разградена. Поради ова, коските стануваат кршливи и слаби, посклони кон фрактури, а нивното заздравување може да биде тешко.
Постарите жени се особено изложени на ризик од остеопороза бидејќи нивото на естроген , хормон кој игра важна улога во метаболизмот на коските, се намалува по менопаузата. Операцијата за отстранување на јајниците може да има сличен ефект.
Истражувачите за јавно здравје од Универзитетот Флиндерс во Австралија ги анализирале навиките за консумирање чај и кафе кај околу 9.700 жени од САД на возраст над 65 години, како дел од поголема студија за остеопороза објавена во 2025 година, објавена во списанието Nutrients.
Во четири наврати, во период од приближно десет години, учесниците преку анкети известиле колку често пијат чај и кафе.
Истражувањето, исто така, вклучуваше податоци за здравјето на нивните коски. Густината на коскените минерали (GMD ) беше мерена во пределот на колкот и на тесниот дел од спојот на бедрената коска со колкот, со помош на рендгенско снимање, кое ја одредува количината на минерали во коските.
Жените кои редовно пиеле чај имале малку, но статистички значајно поголема густина на коскените минерали во колкот во споредба со жените кои не пиеле чај.
Едно можно објаснување се соединенијата во чајот, познати како катехини , кои би можеле да ја стимулираат работата на клетките одговорни за градење на коските.
„Дури и малите подобрувања во густината на коските можат да доведат до помалку фрактури кога зборуваме за големи групи луѓе“, рече епидемиологот Енву Лиу од Универзитетот Флиндерс.
Специјален ефект кај жени со прекумерна тежина
Консумирањето чај имало особено позитивен ефект кај жените со дебелина.
Од друга страна, резултатите во врска со кафето беа мешани. Жените кои пиеле повеќе од пет шолји кафе дневно имале поголема веројатност да имаат пониска густина на коскените минерали, што е во согласност со истражувањата што покажуваат дека кофеинот може негативно да влијае на апсорпцијата на калциум.
Пиењето кафе во која било количина беше поврзано и со намалена густина на минерали во коските на фемурот кај жените кои консумирале поголеми количини алкохол во текот на животот. Ова укажува дека ефектите на овие два фактори врз здравјето на коските може да се надополнуваат меѓусебно кога се комбинираат.
Важно е да се напомене дека учесниците во истражувањето беа претежно бели жени, поради што резултатите не мора нужно да се применат на пошироката популација.
„Нашите резултати не значат дека мора да се откажете од кафето или да почнете да пиете огромни количини чај“, објасни Лиу, додавајќи дека умереното консумирање чај може да биде еден едноставен начин за поддршка на здравјето на коските, додека многу големи количини кафе можеби не се идеални, особено кај жените кои пијат алкохол.
„Иако калциумот и витаминот Д се сè уште основа на здравјето на коските, она што е во вашата шолја може исто така да игра улога. За постарите жени, уживањето во дневна шолја чај може да биде повеќе од пријатен ритуал – може да биде мал чекор кон посилни коски“, рече тој.
