Украинскиот претседател Володимир Зеленски предупреди дека колапсот на Украина би можел да принуди 20 милиони Украинци да избегаат во Европа, повикувајќи на континуирана поддршка за одбрана на земјата од руска агресија.
Тој, исто така, го критикуваше договорот на американскиот претседател Доналд Трамп со Москва за увоз на дизел, предупредувајќи дека тоа би можело да го отвори патот за ублажување на санкциите кон Русија.
„Ако паднеме, 20 милиони Украинци ќе дојдат во Европа. Затоа се стремиме да останеме силни и да ја браниме нашата земја“, изјави тој, нагласувајќи ја важноста на европската поддршка за Украина.
Украинскиот лидер рече дека неговата земја има поддршка од сите европски лидери, негирајќи ги извештаите дека тие го замолиле да го омекне тонот во односите со американскиот лидер.
„Немаше никакви прекори за време на денешните состаноци. Од моите европски колеги слушнав само поддршка, за што сум благодарен“, рече тој на прес-конференција, откако присуствуваше на дел од самитот на Европската унија посветен на Украина и на билатералните средби со европските лидери.
Според некои медиумски извештаи, европската страна го замолила Зеленски да избегнува заострување на тонот кон Трамп, за да не се влошат дополнително односите со американскиот претседател.
Коментирајќи ја изјавата на Трамп дека преговорите со него се потешки од оние со рускиот претседател Владимир Путин, Зеленски нагласи дека негова одговорност е да го заштити постоењето на Украина.
Тој, исто така, го критикуваше договорот на Трамп со Русија за увоз на дизел, предупредувајќи дека таков потег би можел да го отвори патот за понатамошно ублажување на санкциите кон Москва.
Според украинскиот претседател, по договорите за дизел-нафтата може да следат договори за рускиот гас, укинување на санкциите врз банкарскиот систем, одредени поединци и хемиската индустрија и, на крајот, за замрзнатите руски средства.
На прашањето дали Украина ќе продолжи со нападите врз руските рафинерии и покрај барањето на Трамп да ги запре, Зеленски не даде директен одговор.
„Обично не зборувам за деталите од нашите операции. Ќе видите“, рече тој.
Зеленски изјави дека Путин не сака мир, но има намера да ја уништи Украина.
