Инспекциските служби вчера спровеле координирана акција на неколку локации во Скопје, при што биле отстранети нелегалните улични продавачи кај Клиничкиот центар, Зелениот пазар и Буњаковец.
Акцијата ја спровел Инспекторатот на Град Скопје, во соработка со Државниот пазарен инспекторат, Агенцијата за храна и ветеринарство и Инспекторатот на Општина Центар.
Од Град Скопје информираат дека целта на контролите е воспоставување комунален ред, спречување на нелегалната трговија, заштита на јавните површини и обезбедување еднакви услови за сите трговци кои работат согласно законските прописи.
„Нема да дозволиме јавните површини да се узурпираат и да се користат за нелегална продажба“, порачуваат од Град Скопје.
Оттаму најавуваат дека инспекциските контроли и координираните активности ќе продолжат и во наредниот период, со цел одржување на комуналниот ред и почитување на законите на целата територија на градот.
