Португалската полиција во недела наутро растера стотици демонстранти на плоштадот Росио во Лисабон и отстрани повеќе од 50 шатори, поставени по протестите против владиниот закон за изнајмување станови.
Десетици полицајци, некои со кучиња, влегоа во кампот, откако полицискиот командант Јури Родригес трипати ги предупреди демонстрантите дека нелегално поставените шатори ќе бидат отстранети доколку самите не ги отстранат. Тој исто така рече дека оние што ќе се спротивстават ќе се соочат со обвиненија за непослушност. Стотици луѓе што го заштитуваа кампот беа растерани од полицијата со штитови, а во некои случаи и со палки, објави Ројтерс.
Шаторите беа поставени по маршот низ центарот на Лисабон во саботата, на кој учествуваа неколку илјади луѓе. Полицијата, исто така, отстрани сличен, но помал камп на плоштадот Дом Жоао I во Порто во неделата.
Пратеникот на социјалистите, Педро Делгадо Алвес, пред интервенцијата изјави дека на плоштадот Росио е мирно. Според неговите зборови, ништо не ја оправдува „полициската интервенција со сила, физичко насилство или палки, сцени како што видовме минатата недела“.
Полицијата беше критикувана и пред една недела, кога употреби палки за да ги растера демонстрантите на истите плоштади и уапси десетици луѓе.
Демонстрантите бараат владата да го повлече законот со кој се олеснуваат иселувањата и се укинуваат ограничувањата за кирија за нови договори за закуп. Законот помина на прво читање во парламентот, а крајно десничарската партија Чега беше воздржана. Премиерот Луис Монтенегро во четврток одби да го повлече законот, но рече дека е отворен за промени пред конечното гласање, кое се очекува во наредните недели. Партиите, рече тој, мора да се зближат, но нагласи дека главната линија на дејствување е програмата на владата.
Лидерот на Социјалистичката партија, Хозе Луис Карнеиро, во саботата ја повика владата да разговара со опозицијата и демонстрантите. Тој предупреди дека владата не треба „дрско да ги наметнува своите ставови, понекогаш дури и со авторитарни призвуци“.
Португалија е во една од најтешките кризи со домувањето во Европа, а младите луѓе се меѓу најпогодените. Цените на недвижностите се зголемија повеќе од двојно од 2017 година, а кириите за нови договори за закуп речиси се удвоија.
Протестите поради цените на становите се зголемуваат во последните недели во Шпанија, Франција, Германија и други европски земји.
